16

کورونا وائرس : بھارت وبا سے متاثرہ دنیا کا دوسرا ملک بن گیا

نئی دہلی : ہندوستان میں کورونا وائرس کی صورت حال تشویش ناک ہوتی جارہی ہے، گزشتہ 24 گھنٹوں میں91 ہزار سے زائد نئے کیسز رپورٹ ہوئے جس کے بعد بھارت نے برازیل کو پیچھے چھوڑ دیا اور دنیا کا دوسرا متاثرہ ملک بن گیا۔

تفصیلات کے مطابق بھارتی حکومت کی جانب سے جاری کردہ تازہ ترین اعداد و شمار میں بتایا گیا ہے کہ گزشتہ 24 گھنٹوں میں 91ہزار 732 نئے کیسز سامنے آئے، جس کے ساتھ ہی بھارت میں کورونا سے متاثرین کی مجموعی تعداد 42 لاکھ چار ہزار 784ہوگئی ہے۔

ان اعداد و شامر کے بعد بھارت نے کوویڈ 19کے حوالے سے برازیل کو بھی پیچھے چھوڑ دیا اور اب اس کا شمار دنیا میں سب سے زیادہ متاثرہ ممالک میں دوسرے نمبر پر ہے، برازیل میں متاثرین کی تعداد 41 لاکھ 37 ہزار 606 ہے۔ بھارت اب صرف امریکا سے پیچھے ہے جہاں متاثرین کی تعداد 64 لاکھ سے زائد ہے۔

عالمی ادارہ صحت (ڈبلیو ایچ او) کے اعداد و شمار کے مطابق بھارت میں گزشتہ تقریباً ایک ماہ کے دوران کورونا سے متاثر ہونے والوں کی یومیہ تعداد دنیا میں سب سے زیادہ ہے، جس سے یہ کہنا مشکل نہ ہوگا کہ بھارت،امریکا کو بھی پیچھے چھوڑ سکتا ہے۔

حالانکہ پچھلے ایک ماہ سے متاثرین کی تعداد میں بڑی تیزی سے اضافہ ہورہا ہے لیکن پچھلے بارہ دنوں کے دوران اس میں غیرمعمولی تیزی آگئی ہے اور ہر روز 75 ہزار سے زائد نئے کیسز سامنے آئے ہیں۔

امریکا اور برازیل میں ہر روز نئے کیسز کی تعداد اس سے بہت کم ہے۔ امریکا میں یومیہ نئے کیسز کی تعداد 40 تا 50 ہزار ہے جبکہ برازیل میں سنیچر کے روز 51 ہزارنئے کیسز سامنے آئے لیکن بعض دنوں میں یہ تعداد 20 ہزار سے بھی کم رہی۔ ایسے میں ماہرین کا کہنا ہے کہ اگلے چند دنوں میں بھارت، امریکا کو بھی پیچھے چھوڑ سکتا ہے۔

نئے کیسز میں اضافہ کے ساتھ ساتھ اموات کی تعداد میں بھی مسلسل اضافہ ہورہا ہے۔ اب روزانہ ایک ہزار سے زائد اموات ہورہی ہیں۔ پچھلے 24 گھنٹوں میں کورونا سے ایک ہزار 16 نئی اموات کے ساتھ بھارت میں کورنا سے ہلاک ہونے والوں کی تعداد 71 ہزار 701 ہوگئی ہے، اموات کے لحاظ سے بھارت، امریکا اوربرازیل کے بعد تیسرے نمبر پر ہے۔

اس خبر پر اپنی رائے کا اظہار کریں

اپنا تبصرہ بھیجیں